عبدالفتاح المقص

الاولي 
انا غادة عبد الفتاح ممرضة سني ٢٢ سنه 
ابويا عبد الفتاح المقص ترزي رجالي بيفصل جلاليب قمصان بنطلونات اي حاجة .. 
اي حته قماش تقع تحت ايده بتطلع 
تحفه فنيه عشان كدا سموه المقص عشان بصراحه لما بيمسك المقص بيبقي عامل زي الرسام وهو ماسك الفرشة بيبدع ويطلع كل المواهب اللي جواه علي قطعة القماش.. 

وفي مره وهو قاعد جوة الدكانه بتاعته اللي جوة حارة ضيقة في منطقة شعبية وكالعادة زحمه كبيرة عنده ولا كأنه محل فول وطعميه وقفت قدام الدكان عربية سودا طويلة وفخمه اوي ونزل السواق فتح الباب للكرسي اللي وراه ونزل راجل طويل وعريض عجوز اينعم سنه حوالي ٥٠ سنه لكن سنه مش باين عليه من العز اللي هو فيه شعره ابيض ناعم ولابس بالطو اسود لأننا كنا في عز البرد وفي ايده سېجار طويل .. 
واول ما نزل من العربية الحارة كلها وقفت علي رجل والرجالة قبل العيال اترصوا قدام الدكان عشان يعرفوا الراجل دا جاي عند ابويا ليه ..
حتي الستات فضلت واقفة في البلكونات مستغربه وبتكلم بعضها وبيسألوا مين الباشا دا !! 
المهم الحارة اللي مش بتبطل دوشة ليل ونهار اتحولت فجأة لهدوء تام ترمي الابرة علي الارض ترن !! 
صمت رهيب اصاب الحارة ودا كله عشان يحاولوا يسمعوا الراجل دا دخل حارتنا ليه وجاي عند ابويا بالذات عشان ايه !! 
المهم الراجل دخل الدكان وابويا قلق لما شافه جاي ناحيته وقام واقف علي حيله
الرجل.. انت عم عبدالفتاح المقص
عبد الفتاح .. ايوا انا يا بيه .. 
حضرتك عدم لا مؤاخذة مين !!
الرجل .. هتعرف كل حاجة .. 
بس ياريت نكون لوحدنا بعد ازنك
عبد الفتاح .. هو عدم لا مؤاخذة انا عملت حاجة !! 
انا طول عمري في حالي وماشي جمب الحيط !!
الرجل .. متخفش يا راجل يا طيب .. 
انا عايزك في موضوع خير
عبد الفتاح .. خير !! 
طب يا جماعة بعد ازنكم سيبونا لوحدنا دقيقتين
وتخرج جميع الزبائن ويغلق عبد الفتاح باب الدكان ثم يسأل في دهشة
عبد الفتاح.. أأمر يا سعت البيه ..
الرجل .. مالك يا راجل يا عجوز وشك اتخطف ليه كدا وجاب الوان اول ما جيتلك!
عبد الفتاح .. اصل بصراحة شكل سعتك وهيئتك متقلش انك جاي تفصل عندي حتة قماش .. عدم لا مؤاخذة البالطو اللي عليك دا بالشئ الفلاني ومستورد كمان
الرجل .. انا فعلا جايلك في موضوع تاني غير التفصيل .. بص يا سيدي انا زاهر ابو النورس رجل اعمال معروف في الدنيا كلها وجاي انهارده عشان اطلب ايد بنتك غادة
عبد الفتاح.. غادة !! 
بنتي انا !!
الرجل .. ايوا
عبد الفتاح .. تقصد جواز يعني !!
الرجل .. امال هطلب ايديها عشان اكل بيها مثلا !! 
طبعا جواز يا راجل يا عجوز
عبد الفتاح .. ومين العريس يا